Azərbaycan Respublikasının paytaxtı Bakı şəhərində Nurlar mətbəəsində Doktor Şeyx Abdullah Əhməd əl-Yusifinin “İmam Əlinin (ə) ən birinci olduğu iyirmi fəzilət”adlı kitabı ilk dəfə azərbaycan dilində işıq üzü görmüşdür. Kitab orta həcmli olaraq 64 səhifədən ibarətdir. Çap tarixi miladi 2017 –ci il hicri 1439 –cu ildir. Adı çəkilən kitab İmam Əlinin (ə) nə əvvəlkilərin ondan əvvəl sahib olduqları, nə də ki, sonrakıların ondan sonra sahib ola biləcəkləri iyirmi fəzilətindən bəhs edir. Gənc nəsil İmam Əlinin (ə) məqamı və fəzilətlərindən xəbərdar olması üçün kitabda hər iki məzhəbin (şiə və sünni) hədis qaynaqlarından İmam Əlinin (ə) hamıdan öndə olduğu ən əsas fəzilətləri müxtəsər və müasir üslubda qeyd edilmişdir. Müəllif kitabın müqəddiməsində İslam tarixi qaynaqlarının və mənbələrinin əksəriyyətinin İmam Əlinin (ə) İslamı ilk qəbul edən şəxs olmasını, Rəsulullaha (s) vəhy nazil olduğu ilk günündən ona iman gətirdiyini, onun arxasında namaz qılan, rifah və çətinlikdə daima onunla birlikdə olan ilk şəxs olmasını bəyan etmişdir. İmam Əlinin (ə) həyatını oxuduqda onun onun hər bir şeydə ilk qabaqcıl olduğunu görürük. İmam Əli (ə) ilk İslamı qəbul edən, Peyğəmbərlə (s) ilk namaz qılan, ilk dəfə möminlərin əmiri titulunu daşıyan, ilk dəfə Qurani-kərimi cəm edən və Quran elmlərinin əsasını yaradan, Peyğəmbərin (s) ilk şagirdi, o həzrətə ilk beyət edən və köməyinə yetişən, ilk vəhy katibi, ilk dəfə müsəlmanlar üzərində rəhbər seçilən, Peyğəmbər (s) üçün canını fəda edən ilk şəxs, Allah yolunda ilk mücahid, İslam bayrağını daşıyan və Rəsulullah (s) adından təbliğ edən ilk şəxsdir. O həzrət yeganə müsəlmandır ki, Rəsulullah (s) onun üzərində heç kimi rəhbər təyin etməmişdir. O həzrət ilk qazi, ilk haşimi xəlifə, İslam dövlətinin qanunlarını ilk formalaşdıran, İslamda ilk kitab qələmə alan, ərəb dilinin qrammatikasının əsasını və kəlam elmini yaradan və məsciddə doğulub məsciddə şəhid olan ilk şəxsdir.... Bu siyahı yazmaqla bitməz!

Məhz buna əsasən də İmam Əli (ə) ədalətli olan tarixçilərin, yazarların və mütəfəkkirlərin nəzərində İslam tarixində, hətta bəşər tarixində nadir bir şəxsiyyətdir.

Həzrət Rəsulullah (s) dəfələrlə Əmirəlmöminin (ə) fəzilətləri və üstün cəhətləri barədə çox xatırlatmışdı. Hədis və ravayət alimləri İmam Əlinin (ə) fəzilətləri barədə nəql olunan hədisləri ehtiva edən çoxlu kitablar yazmışlar. Belə kitablar təkcə müəyyən bir məzhəbə məxsus olmamışdı. Bütün məzhəblərin alimləri bu mövzuya çox əhəmiyyət vermişlər. Həmin kitablardan İmam Nisainin “Xəsaisu əmirəlmuminin”, Xarəzminin “əl-Mənaqib”, İsfəhaninin “Mənaqibu Əli bin Əbi Talib”, İbn Şəhr Aşubun “Mənaqibu Ali Əbi Talib” və İmam Əlinin (ə) fəzilətləri barədə qələmə alınmış digər kitabları qeyd etmək olar.

Allah-təala hər zamanda və hər məkanda Əmirəlmöminin İmam Əlinin (ə) fəzilətləri və üstünlükləri barədə kitab yazacaq və insanlar arasında onu yayacaq alimlər və hədis hafizləri meydana çıxarmışdır. Baxmayaraq ki, həmin müəlliflər belə kitabları yaydıqları üçün təqib və zülmə məruz qalmış, bəziləri isə bunun müqabilində həyatını qurban vermişdir. İmam Əlinin (ə) düşmənləri onun fəzilətlərini və üstünlüklərini gizlətməyi bacarmadılar. Çünki haqq ucadır, heç bir şey haqdan uca ola bilməz!

Qeyd etmək lazımdır ki, kitab ilk dəfə miladi 2014-cü, hicri 1435 -ci ildə Beyrutda Ənvarul-huda mətbəəsində 95 səhifədən ibarət çap olunmuşdur.